DHUUSOMAREEB – Madaxweyne ku xigeenka Dowlad Goboleedka Galmudug Cali Daahir Ciid ayaa magaalada Dhuusamareeb ka daah-furay Shirka Madasha Bani’aadannimada Soomaaliya (CHF) oo ay soo qaban-qaabisay Hay’adda Maareynta Musiibooyinka (SoDMA) loogana hadlayo xaaladaha la xariira arrimaha bani’aadannimo ee waddanka.
Shirkaan waxaa ka qeyb-galaya, Guddoomiyaha Hay’adda Maareynta Musiibooyinka Md. Maxamuud Macallin Cabdulle, wakiilo kale oo ka socda Dowladda Federaalka, Wasaaradaha Gargaarka ee Dowladaha xubnaha ka ah Dowladda Federaalka, Maamulka Khaatumo, Gobalka Banaadir, Gobolka Galgaduud, madax ka socota deeq-bixiyaasha, ururrada maxaliga ah iyo kuwa caalamiga ah.
Ku xigeenka Ergayga Gaarka ah ee Xoghayaha Guud ee Qaramada Midoobey, ahna Iskuduwaha gargaarka bani’aadannimada George Conway oo khudbad ka jeediyay shirka Madasha Arrimaha Bani’aadannimada (CHF) ayaa xusay muhiimadda ay leedahay in wadajir la isaga kaashado dadaallada adkaysiga iyo diyaar-garowga ku aaddan dadaallada ka jawaabidda.
Ergayga ayaa bogaadiyay guulaha laga gaaray howlgallada bani’aadannimo ee ay hormuudka u tahay Hay’adda Maareynta Musiibooyinka (SoDMA).
