Beijing, China – Ra’iisul Wasaaraha Jarmalka Friedrich Merz ayaa booqashadiisii ugu horreysay ku tagay Shiinaha iyadoo lagu wado in diiradda lagu saaro dib u habeynta xiriirka ganacsiga labada dal, iyo xoojinta iskaashiga.
Mar uu Arbacadii ka hadlayay Beijing, ra’iisulwasaare Merz ayaa u sheegay Ra’iisul Wasaaraha Shiinaha Li Qiang in Jarmalku doonayo inuu dhiso xiriirka dhaqaale ee tobanaan sano jirsaday ee Shiinaha iyo Jarmalka, isagoo ku nuuxnuuxsaday baahida loo qabo in la hubiyo iskaashi caddaalad ah iyo isgaarsiin furan.
Li, oo la kulmay Merz wax yar ka dib markii uu yimid Hoolka Weyn ee Dadka ee Beijing, ayaa ugu baaqay labada dhinac inay si wadajir ah uga shaqeeyaan ilaalinta iskaashiga dhinacyo badan iyo ganacsiga xorta ah, isagoo tixraacaya siyaasadda canshuuraha ee Madaxweynaha Mareykanka Donald Trump oo carqaladeysay nidaamka ganacsiga adduunka.
Ra’iisulwasaaraha Shiinaha oo geestiisa hadlay ayaa yiri “Shiinaha iyo Jarmalka, oo ah laba ka mid ah dalalka leh dhaqaalaha ugu waaweyn adduunka iyo waddamada leh saameynta muhiimka ah, waa inay xoojiyaan kalsoonida aan ku qabno iskaashiga, si wadajir ah u ilaaliyaan iskaashiga dhinacyada badan iyo ganacsiga xorta ah, oo ay ku dadaalaan sidii loo dhisi lahaa nidaam maamul oo caalami ah oo caddaalad ah”.
Intii uu socday kulanka, wakiillo ka kala socday labada dhinac ayaa kala saxiixday dhowr heshiis iyo qoraallo, oo ay ku jiraan isbeddelka cimilada iyo amniga cuntada.
R’iisulwasaaraha Jarmalka ayaa sheegay “Waxaan wadaagnaa mas’uuliyadda adduunka, waana inaan si wadajir ah u fulinnaa mas’uuliyaddaas,”.
Ra’iisulwasaare Merz ayaa intaas kudaray in marinnada isgaarsiinta ee furan ay muhiim yihiin, isagoo ku dhawaaqay booqashooyin ay sameeyn doonaan dhowr wasiir oo katirsan xukuumada Jarmalka bilaha soo socda.
