Tokiyo, Japan – Dhulgariir cabirkiisu yahay 7.5 ayaa maanta ka dhacay xeebta waqooyiga bari ee Japan, taasoo keentay in mas’uuliyiintu ay ku booriyaan dadka deegaanka inay ka fogaadaan meelaha xeebaha ah ee la filayay in hirarka tsunami ay gaaraan 3 mitir.
Laba saacadood ka dib dhulgariirkii, oo dhacay 4:52 galabnimo, ayaa la ogaaday in hirarka tsunami ay gaareen 80 cm, inkastoo digniino laga bixiyay mowjado waaweyn oo ka dhici kara dusha sare ee jasiiradda ugu weyn ee Honshu ee Japan, iyo gobolka waqooyiga Hokkaido.
Afhayeenka dowladda Japan, Minoru Kihara, ayaa shir jaraa’id ku sheegay in aysan jirin wax warar ah oo ku saabsan khasaaraha iyo burburka baaxadda leh, iyadoo habeen uu ka dhacay caasimadda Tokyo.
Magaalooyin dhowr ah oo dekedo ah oo ay ku jiraan Otsuchi iyo Kamaishi oo labaduba ay si xun u saameeyeen dhulgariirkii weynaa iyo tsunami sannadkii 2011 ayaa hore u soo saaray amarro daadgureyn ah kumanaan qof oo deggan, sida laga soo xigtay warbaahinta dadweynaha ee NHK.
Adeegyada tareenka rasaasta oo loo yaqaano “Bullet Train” ayaa la joojiyay,sido kale qaar ka mid ah waddooyinka waaweynna ayaa la xiray gariirka awgiis.
Dhulgariirro waaweyn ayaa dhici kara maalmaha iyo toddobaadyada soo socda, sida uu sheegay sarkaal ka tirsan Hay’adda Saadaasha Hawada ee Japan (JMA).
