Beirut, Lebanon –Ra’iisul wasaaraha dalka Lebanon Nawaf Salam ayaa ku eedeeyay Israel in ay galeen xadgudubyo sharciyada dagaalka ah kadib duqeyn ka dhacday koonfurta Lubnaan oo lagu dilay weriye laguna dhaawacay mid kale.
Duqeynta ayaa lagu dilay Amal Khalil oo u shaqeyn jirtay wargeyska Al-Akhbar, halka sawirqaade madax-bannaan Zeinab Faraj uu ku dhaawacmay.
Mas’uuliyiinta Lubnaan waxay sheegeen in labada wariye si ula kac ah loo bartilmaameedsaday xilli ay gambad ka raadinayeen guri kadib markii weerar hore uu ku dhacay gaari agtooda marayay oo lagu dilay laba nin.
Sidoo kale, Lubnaan waxay ku eedeysay ciidamada Israel inay beegsadeen ambalaas si cad loo calaamadeeyay oo isku dayaysay inay gaarto goobta wariyeyaasha ee tuulada Tayri, Ciidamada Israa’iil ayaa dhankooda beeniyay inay hor istaageen gurmad ama inay si gaar ah u beegsadeen wariyeyaasha, iyagoo sheegay in aysan bartilmaameedsan saxaafadda.
Ra’iisul wasaare Salam ayaa sheegay in beegsiga wariyeyaasha, xannibaadda gurmadka, iyo weerarada soo noqnoqda ee lagu qaaday goobaha ay joogaan ay yihiin ficillo lagu tilmaami karo dambiyo dagaal, isagoo ku adkeystay in tani ay tahay hab joogto ah oo ka socda koonfurta Lubnaan.
Lebanon Ra’iisul wasaare Nawaf Salam ayaa tacsi u diray qoyska Amal Khalil, isagoo sheegay in Lubnaan ay dacwadaha la xiriira dhacdadan horgeyn doonto maxkamadaha iyo hay’adaha caalamiga ah ee awoodda u leh.
Dhanka kale, ciidamada Israel ayaa bayaan ay soo saareen ku sheegay in aysan si gaar ah u bartilmaameedsan wariyeyaasha, isla markaana ay qaadaan tallaabooyin lagu yareynayo waxyeellada rayidka, iyagoo sidoo kale xusay in ay ilaalinayaan amniga ciidamadooda.
