Kathmandu, Nepal – Dab ayaa ka kacay diyaarad ay leedahay Turkish Airlines xilli ay ku degaysay garoonka caalamiga ah ee Tribhuvan ee magaalada Kathmandu maanta oo Isniin ah, balse ma jirin wax dhaawac ah oo ka dhashay shilkaasi.
Diyaaradda oo ka timid Istanbul ayaa la sheegay inay qiiq iyo dab ka muuqdeen qeybta taayirrada midig ee diyaaradda markii ay soo caga dhigatay, iyadoo ciidamada gurmadka degdega ah ay si dhaqso leh u xakameeyeen dabka.
Mas’uuliyiinta garoonka ayaa sheegay in si nabad ah loo daadgureeyay dhammaan 277 rakaab ah iyo 11 xubnood oo shaqaalaha diyaaradda ka tirsanaa, kadib markii dabku ka kacay taayirka dambe ee midig.
Shilkaasi ayaa sababay in si ku meel gaar ah loo xiro garoonka diyaaradaha ee Kathmandu, halka diyaarado kale oo kusii jeeday magaalada lagu amray inay hawada ku sugaan inta baaritaannadu socdaan.
Nepal ayaa muddo dheer la daalaa-dhacaysay shilalka diyaaradaha, iyadoo buuraha dhaadheer iyo cimilada isbedbeddesha ay ka dhigaan duulimaadyada kuwo halis badan. Sannadkii 2015 ayay sidoo kale diyaarad Turkish Airlines ah ka baxday runway-ga garoonka Kathmandu xilli ceeryaamo xooggan jirtay.
