Hadramout, Yemen – Koox hubeysan ayaa Jimcihii afduubatay markab shidaal oo marayay meel ka baxsan xeebaha bari ee Yemen, taasoo dhalisay in ciidamada ilaalada xeebaha Yemen ay bilaabaan wada-shaqeyn ay la leeyihiin hay’adaha caalamiga ah ee amniga badda.
Ciidanka Ilaalada Xeebaha Yemen ayaa sheegay in markabka lagu magacaabo ASANA lagu weeraray qiyaastii 26 mayl-badeed u jirta gobolka Hadramout. Wararka hordhaca ah ayaa tilmaamaya in markabka uu si gaabis ah ugu socday dhanka koonfur-bari, isagoo ku wajahnaa Soomaaliya.
Mas’uuliyiinta ayaa sheegay in xarunta howlgalka ay si degdeg ah ula xiriirtay hay’adaha caalamiga ah iyo maamulka badda ee ka howlgala gobolka, si loo xaqiijiyo xaaladda markabka loona ilaaliyo badqabka maraakiibta isticmaasha marin-biyoodka Gacanka Cadmeed.
Ciidamada badda, oo ay ku jiraan doon ay leeyihiin Ilaalada Xeebaha Yemen, ayaa loo diray goobta, halka diyaarado kormeer ah ay dusha kala socdeen xaaladda markabka iyo dhaq-dhaqaaqyada la xiriira afduubka.
Dhanka kale, Hay’adda UK Maritime Trade Operations (UKMTO) ayaa hore u sheegtay in markab marayay Gacanka Cadmeed ay koox hubeysan si sharci darro ah ula wareegtay, iyadoo baaritaannada iyo la socodka xaaladda ay weli socdaan.
