Moscow, Ruushka – Mas’uuliyiinta Ruushka ayaa sheegay in weerar diyaarado aan duuliye lahayn oo Ukraine ay ku qaadday gudaha dalka uu sababay dhimashada ugu yaraan 7 qof iyo dhaawaca tobannaan kale.
Weerarka ayaa lagu sheegay inuu ka dhacay magaalada Kotovsk ee gobolka Tambov, halkaas oo drones ay ku dhaceen bakhaar ay leedahay shirkad ganacsi oo internetka ka shaqeysa, taasoo sababtay dhimasho iyo dhaawacyo.
Mas’uuliyiinta magaalada Moscow ayaa sidoo kale sheegay in weerarro kale ay ka dhaceen magaaloyinka Elektrostal iyo Noginsk, kuwaas oo sababay dhaawacyo iyo dab ka kacay goob shidaal lagu kaydiyo.
Wasaaradda Difaaca Ruushka ayaa sheegtay in difaaca cirka uu soo riday boqolaal diyaaradood oo aan duuliye lahayn oo lagu soo weeraray Ruushka iyo deegaannada ku dhow.
Dhanka kale, Ukraine ayaa sheegtay inay beegsatay xarumo saadka iyo qalabka milatari ee Ruushka, iyadoo dagaalka labada dal uu weli ka socdo weerarro cirka ah.
