Arlit, Niger – Kolonyadii ugu horreysay ee ciidamo milatari oo Aljeeriyaan ah ayaa gaartay magaalada Arlit ee waqooyi-galbeed Niger, si ay u sugaan danaha dhaqaale iyo mashaariicda muhiimka ah ee tamarta ee dalkaas ku leeyahay gobolka Saaxil ee Afrika, tallaabadan ayaa ah markii ugu horreysay tan iyo dagaalkii 1973-kii ee Aljeeriya ay ciidamo u dirto meel ka baxsan dalkeeda
iyadoo xilligaas ay taageero milatari u dirtay Masar dagaalkii ay la gashay Israa’iil. Dowladda Aljeeriya ayaa sheegtay in ciidamadan loo diray ilaalinta danaha dhaqaale iyo tamarta, balse ma aysan shaacin tirada ciidamada ama muddada ay howlgalkoodu socon doono.
Go’aanka dirista ciidamada ayaa yimid kaddib markii labada aqal ee Baarlamaanka Aljeeriya ay 25-kii Oktoobar si wadajir ah u ansixiyeen codsi uu soo gudbiyay Madaxweyne Abdelmadjid Tebboune, kaas oo ku saabsanaa in ciidamo loo diro Niger. Tallaabadan ayaa lagu sheegay inay ku timid codsi ka yimid dowladda Niger, si loo ilaaliyo mashaariicda maalgashi ee Aljeeriya, gaar ahaan kuwa ay leedahay shirkadda shidaalka ee Sonatrach.
Dirista ciidamada ayaa sidoo kale muujinaysa soo dhowaanshaha xiriirka amni iyo siyaasadeed ee labada dal, kaddib xiisado ka dhashay afgambigii milatari ee Niger ka dhacay sannadkii 2023-kii, kaas oo xilka looga tuuray madaxweynihii hore Mohamed Bazoum. Aljeeriya ayaa markii hore ka soo horjeesatay afgambiga, balse xiriirka labada dal ayaa soo hagaagay tan iyo sannadkii hore, inkastoo ay jireen khilaafaad diblomaasiyadeed oo la xiriiray eedeymo ku saabsan diyaarad aan duuliye lahayn oo lagu soo riday xadka.
Tallaabadan waxaa ka horreeyay booqasho uu Wasiirka Difaaca Niger Salifou Mody ku tagay Aljeeriya iyo heshiis iskaashi milatari oo ay labada dal kala saxiixdeen 21-kii Oktoobar. Aljeeriya ayaa sidoo kale bishii Agoosto u dirtay Niger afar diyaaradood oo dagaal oo nooca Sukhoi-30 ah iyo diyaarad shidaal siisa diyaaradaha kale. Niger ayaa weli wajahaysa dagaallo ay kula jiraan kooxo hubeysan, halka Aljeeriya ay xasilloonida gobolka Saaxil iyo Saxaraha u aragto mudnaan amni oo muhiim ah.
