Wasiirka Warfaafinta Puntland, Mudane Maxamuud Caydiid Dirir oo shir jaraa’id u qabtay Wariyeyaasha ayaa ka falceliyay hadal maanta kasoo yeeray Madaxweyne Xasan Sheekh oo ahaa in Al-Shabaab ay qaadan karaan kaarka aqoonsiga ee Hay’adda NIRA.
Caydiid ayaa si weyn uga horyimid hadalkan, wuxuuna sheegay in cid kasta oo qaadata kaarka NIRA ay u aqoonsan doonaan cadow, ayna xiri doonaan, sida uu hadalka u dhigay.
Waxaa kale oo uu sii raaciyay “Kaarka NIRA ebel sharci darro ayuu ku yimid wax Soomaali isku raacsaneyd maaheyn, Xasana isagaa hadda Madaxweyne ah isagaana sheegtay inuu Al-Shabaab kaarka siinayo”.
Sidoo kale, wuxuu hoosta ka xariiqay in dowladda federaalka Soomaaliya iyo Al-Shabaab ay ka dhexeyso wada shaqeyn, isla markaana aysan daacad ka hayn dagaalka socda, sida uu hadalka u dhigay
Hadalkan ayaa kusoo aadayo ayada oo Shalay Madaxweyne Xasan Sheekh oo ka qayb-galay shirweynaha labaad ee Hay’adda Aqoonsiga Qaranka oo lagu soo gabagabeeyay teendhada Afisyooni ee magaalada Muqdisho uu sheegay in xubnaha Al-Shabaab loo ogolyahay in ay qaataan kaarka, ayna ogyihiin in ay soo dirsadaan dad, sidaasna ay ku qaataan.
Madaxweynaha ayaa soo jeediyay in lasiiyo kaarka, lana diiwaangeliyo farahooda iyo wajigooda, isaga oo ku dooday in yihiin muwaadiniin Soomaali ah oo argagixiso noqday.
