Islamabad, Pakistan __ Milatariga Pakistan ayaa sheegay inay xabsiga dhigeen tiro afar qof ah oo lala xiriirinayo inay kadambeeyeen ninkii isku qarxiyay masjid kuyaala caasimada Islamabad ee dalka Pakistan kaas oo dad badan ay kudhinteen, masuuliyiinta amniga dalkaas ayaana xoojiyay howlgalada amni xaqiijinta ah xilli uu sii kordhayo walaaca laga qabo weeraro Dhaka xuduudaha kasoo gudba.
Kumanaan shacab ah ayaa isugu soo baxay maanta oo Sabti ah si ay u aasaan dadkii ku dhintay weerarkii Jimcaha oo ay ku dhinteen ugu yaraan 32 qof oo cibaadeysanayay, halka 170 kalena ay ku dhaawacmeen, sida ay saraakiisha dalkaas sheegeen.
Milateriga ayaa Sabtida maantaa sheegay in horumar weyn laga gaaray baaritaanka lagu hayo weerarkii Trilai Kalan Islamabad, iyadoo hay’adaha sirdoonka iyo kuwa sharci fulinta ay sameeyeen howlgalo lagu qabqabtay laba qof oo magacooda lagu sheegay Peshawar iyo Nowshera.
Milatariga Pakistan ayaa Afgaanistaan ku eedeeyay in qorsheynta, tababarka, iyo caqiidada weerarku ay ka dhaceen gudaha dalka Afgaanistaan, iyagoo intaa ku daray inTaalibaan Afgaanistaan ay gabaad siineyso, kooxaha xagjirka ah waxay sii wadaan inay khatar weyn ku yihiin nabadda gobolka iyo caalamka.
Horaantii maalinta uu dhacay weerarka, booliisku waxa ay sheegeen in labo walaalo ah iyo qof dumar ah la xiray intii lagu guda jiray weerar ay ku qaadeen waxa ay ku tilmaameen goob uu ku dhuumaaleysanayay ismiidaamiyaha.
Qarax xooggan ayaa Jimcihii ka dhacay masjidka Shiicadu maamusho ee Khadiija Tul Kubra oo ku yaalla deegaanka Tarlai Kalan ee duleedka magaalada Islamabad. Kooxda hubaysan ee ISIL ayaa sheegatay mas’uuliyadda qaraxa.
Weerarkan ayaa ahaa kii ugu khasaaraha badnaa ee ka dhaca Islamabad tan iyo bishii Sebtembar 2008-dii, markaasoo weerar ismiidaamin ah oo gaari xamuul ah lagu soo raray lagu dilay in ka badan 60 qof, laguna burburiyay qeyb ka mid ah hoteelka 5-xiddigaha ah ee Marriott. In kasta oo qaraxyada ay naadir ku yihiin caasimadda sida weyn loo ilaaliyo, haddana waa weerarkii labaad ee noociisa ah muddo saddex bilood gudahood ah, taasoo sare u qaadaysa cabsida laga qabo inay dib ugu soo laabtaan rabshadaha ka dhacaya xarumaha waaweyn ee magaalooyinka Pakistan.
