Washington, US – Ciidamada Mareykanka ayaa Arbacadii rasaas ku furay markab shidaal oo wata calanka Iran, kaddib markii madaxweyne Donald Trump uu Tehran u diray digniin cusub oo ku saabsan inay aqbasho heshiis lagu soo afjarayo dagaalka ama ay wajahdo duqeymo cusub oo ka xooggan kuwii hore. Taliska dhexe ee Mareykanka ayaa sheegay in diyaarado dagaal ay beegsadeen markabka kadib markii uu isku dayay inuu jebiyo go’doominta dekedaha Iran.
Trump ayaa qoraal uu soo dhigay baraha bulshada ku sheegay in howlgalka militari ee Mareykanka iyo Israel ay joojin karaan haddii Iran aqbasho heshiiska la isku hayo, balse haddii ay diido ay dib u bilaaban doonaan weerarro culus. Dhanka kale, ra’iisul wasaaraha Israel Benjamin Netanyahu ayaa sheegay in dalkiisu u diyaar garoobay dhammaan xaaladaha suuragalka ah.
Guddoomiyaha baarlamaanka Iran Mohammad Bagher Ghalibaf ayaa ku eedeeyay Mareykanka inuu isku dayayo inuu Tehran ku khasbo tanaasul isagoo adeegsanaya cunaqabateyn badeed, cadaadis dhaqaale iyo olole warbaahineed. Warar kasoo baxay Mareykanka iyo Pakistan ayaa tilmaamay in labada dhinac ay ku dhow yihiin heshiis hordhac ah oo lagu joojinayo dagaalka, inkastoo wada-hadalladu wali adag yihiin.
Xiisadda ayaa sidoo kale saameysay Marin Biyoodka Hormuz, halkaas oo boqolaal maraakiib ganacsi ah ay ku xayiran yihiin kadib hanjabaado uga yimid Iran. Trump ayaa hakiyay howlgal cusub oo lagu ilaalin lahaa maraakiibta, isagoo sheegay in horumar laga sameeyay wada-hadallada. Warbaahinta Mareykanka ayaa sheegtay in Sacuudiga uu ka horyimid qorshahaasi militari.
Dhanka kale, Israel ayaa markii ugu horreysay tan iyo heshiiskii xabbad-joojinta weerar ka fulisay duleedka Beirut ee Lubnaan, iyadoo sheegtay inay bartilmaameedsatay sarkaal ka tirsan ururka Hezbollah.
Ugu yaraan 11 qof ayaa lagu dilay weerarro kale oo ka dhacay koonfurta iyo bariga Lubnaan, halka qiimaha shidaalka caalamka uu hoos u dhacay kadib wararka sheegaya suuragalnimada heshiis u dhexeeya Mareykanka iyo Iran.
