Pacific Ocean – Ciidamada Mareykanka ayaa weerar ku qaaday doon looga shakisan yahay inay ku lug lahayd tahriibinta daroogada bariga Badweynta Baasifigga, Weerarka ayaa sababay dhimashada saddex qof.
Taliska Koonfureed ee Mareykanka ayaa sheegay in doonta ay maamulaysay koox ay Washington u aqoonsatay urur argagixiso. Hase yeeshee, wax caddeyn ah lama soo bandhigin.
Muuqaal uu militarigu baahiyay ayaa muujiyay doon yar oo badda ku socota ka hor inta aan la duqeyn.
Weerarkan ayaa ahaa kii saddexaad ee noociisa ah toddobaadkan. Tirada dadka lagu dilay ololahan ayaa hadda kor u dhaaftay 200 qof tan iyo markii uu billowday bishii Sebtembar ee sanadkii hore.
Khubaro iyo mas’uuliyiin ka tirsan Qaramada Midoobay ayaa cambaareeyay weerarradan, iyagoo ku tilmaamay dilal ka baxsan sharciga. Waxay sidoo kale su’aal geliyeen maqnaanshaha caddeymo muujinaya in doomaha la beegsanayo ay ku lug leeyihiin tahriibinta daroogada.
