Washington, US – Wasaaradda Arrimaha Dibadda Mareykanka ayaa oggolaatay heshiis suurtagal ah oo Kuwait looga iibinayo nidaamyo lagula dagaallamo diyaaradaha aan duuliyaha lahayn iyo qalab kale oo la xiriira, iyadoo qiimaha guud ee heshiiska lagu qiyaasay 1.98 bilyan oo dollar.
Qalabka la qorsheynayo in la iibiyo waxaa ka mid ah nidaamyo casri ah oo loogu talagalay ka hortagga diyaaradaha aan duuliyaha lahayn, xarumo talis iyo kantarool, qalab kormeer oo fog, iyo adeegyo taageero oo kala duwan.
Mareykanka ayaa sheegay in heshiiskani uu xoojin doono awoodda Kuwait ee wax ka qabashada khataraha amni ee hadda jira iyo kuwa mustaqbalka, gaar ahaan kuwa ka imanaya diyaaradaha aan duuliyaha lahayn.
Arrintan ayaa timid kadib kulan ka dhacay Washington oo dhex maray Wasiirka Arrimaha Dibadda Kuwait iyo Xoghayaha Arrimaha Dibadda Mareykanka Marco Rubio, kuwaas oo ka wada hadlay iskaashiga dhinacyada amniga iyo difaaca.
Todobaadkii hore, Kuwait ayaa sheegtay inay mar kale la kulantay weerarro gantaallo iyo Drones ah, iyadoo Iran iyo Mareykankuna ay is dhaafsadeen eedeymo ku saabsan weerarro ka dhacay gobolka.
