Sanca, Yemen – Hoggaamiyaha Xuutiyiinta Yemen, Cabdulmalik Al-Xuuti, ayaa Khamiistii sheegay in kooxdiisu ay beegsan doonto xarun kasta oo Israa’iil ka samaysato Somaliland, isagoo sheegay inay si dhow ula socdaan dadaallada Israa’iil ee lagu doonayo inay saldhig uga samaysato gobolka si ay u maamusho Gacanka Cadmeed, marin-biyoodka Bab al-Mandab iyo Badda Cas.
Khudbad laga baahiyay telefishinka Al-Masirah ayuu Al-Xuuti ugu baaqay dalalka Islaamka iyo kuwa ku teedsan Badda Cas inay qaataan mowqif mideysan oo looga hortagayo waxa uu ku sheegay qorshayaasha Israa’iil ee Somaliland.
Wuxuu sheegay in Yemen aysan daawan doonin joogitaan kasta oo Israa’iil ka samaysato Somaliland, isla markaana aysan sugi doonin cid kale oo tallaabo qaadda. Al-Xuuti ayaa sheegay in kooxdiisu ay si toos ah u beegsan doonto bartilmaameed kasta oo Israa’iil yeelato, iyagoo adeegsanaya dhammaan awoodaha ay haystaan.
Sidoo kale wuxuu ugu baaqay dowladaha inay taageeraan shacabka Soomaaliyeed isla markaana ay ka caawiyaan waxa uu ku tilmaamay la dagaallanka gardarrada Israa’iil.
Hadalkan ayaa yimid toddobaad kadib markii Madaxweynaha Somaliland, Cabdiraxmaan Maxamed Cabdillaahi, uu booqasho ku tagay Israa’iil, halkaas oo uu ka furay safaaradda Somaliland ee magaalada Qudus.
Somaliland ayaa ku dhawaaqday inay ka go’day Soomaaliya sannadkii 1991, hase yeeshee weli ma helin aqoonsi caalami ah, inkastoo ay si iskeed ah u maamusho arrimaheeda siyaasadda, maamulka iyo amniga.
Dowladda Federaalka Soomaaliya ayaan aqoonsanayn madax-bannaanida Somaliland, waxayna u aragtaa inay tahay qayb ka mid ah dhulkeeda, iyadoo heshiis kasta ama xiriir toos ah oo lala yeesho Somaliland ku tilmaanta xadgudub ka dhan ah madaxbannaanida iyo midnimada Soomaaliya.
