Gaza, Falastiin – Xamaas ayaa sheegtay inay diyaar u tahay inay hubka dhigto iyadoo qayb ka ah heshiis xabbad-joojin ah oo uu soo bandhigay Madaxweynaha Mareykanka Donald Trump, kaasoo looga gol leeyahay in lagu soo afjaro dagaalka Gaza.
Kooxda ayaa sheegtay in hubka culus la wareejin doono marxaladaha dambe ee heshiiska, balse waxay ku xirtay shuruud ah in ciidamada Israel ay ka baxaan dhulka Falastiin.
Heshiiska ayaa sidoo kale dhigaya in Israel ay joojiso weerarrada Gaza isla markaana ciidamadeeda dib loo dhigo, iyadoo la qorsheynayo in ciidan caalami ah uu ka shaqeeyo sugidda amniga deegaanka.
Si kastaba, hirgelinta heshiiska ayaa wajahaysa caqabado waaweyn, iyadoo Israel aysan weli si rasmi ah uga hadlin, halka labada dhinac ay horey isugu eedeeyeen jebinta heshiisyo hore.
Khubarada arrimaha Bariga Dhexe ayaa sheegay in hub ka dhigista Xamaas ay noqon doonto isbeddel weyn, maadaama hubku yahay qayb muhiim ah oo ka mid ah awoodda iyo aqoonsiga kooxda.
