Washington, US – Madaxweyne Donald Trump ayaa Congress-ka Mareykanka u gudbiyay heshiis la xiriira tamarta nukliyeerka rayidka ah ee Sacuudiga, iyadoo dowladda Mareykanka ay sheegtay in heshiisku dhaqan geli doono oo keliya haddii Riyadh ay xiriir rasmi ah la sameyso Israa’iil.
Heshiiska oo la gaaray bishii July ayaa shirkadaha Mareykanka u oggolaanaya inay Sacuudiga u dhoofiyaan tignoolajiyada nukliyeerka ee rayidka ah. Qorshahan ayaa ku lug leh dhismaha reactors-ka AP1000, oo ah mashruuc la filayo inuu ku kacayo tobanaan bilyan oo doollar.
Trump ayaa horey u sheegay in heshiiska nukliyeerka uusan horay u socon doonin haddii Sacuudiga uusan ku biirin Heshiisyada Abraham, kuwaas oo lagu caadiyeeyay xiriirka Israa’iil iyo qaar ka mid ah dalalka Carabta iyo Muslimiinta.
Sacuudi Carabiya ayaa dhankeeda muddo ku xirtay aqoonsiga Israa’iil in la helo waddo cad oo aan laga noqon karin oo loo maro dhismaha dowlad Falastiini ah. Arrintan ayaa ka dhigtay heshiiska nukliyeerka mid ku xiran arrimo siyaasadeed oo ka baxsan tamarta.
Qaar ka mid ah xildhibaannada Mareykanka iyo khubarada ka hortagga faafitaanka hubka nukliyeerka ayaa walaac ka muujiyay heshiiska, gaar ahaan haddii uusan si cad uga mamnuucin Sacuudiga kobcinta uranium-ka ama dib-u-warshadaynta walxaha nukliyeerka ka haray, kuwaas oo noqon kara waddo loo maro samaynta hub nukliyeer ah.
