Washington, US – Ciidamada Mareykanka ayaa weerar ku qaaday doon xawaare sare ku socotay oo looga shakiyay inay ku lug lahayd ka ganacsiga daroogada, taasoo maraysay marinno loo yaqaan inay isticmaalaan kooxaha daroogada ka ganacsada ee Badda Caribbean-ka. Taliska Koonfurta Mareykanka (SOUTHCOM) ayaa sheegay in weerarka lagu dilay afar qof.
Taliska ayaa sheegay in hawlgalka ay fulisay “Joint Task Force Western Hemisphere”, iyadoo lagu qaaday weerar ay ku tilmaameen mid khasaaro geystay oo toos ah. SOUTHCOM ayaa sheegtay in doonidu ku shaqeynaysay waddooyin si joogto ah loogu adeegsado tahriibinta iyo ka ganacsiga daroogada ee Badda Caribbean-ka.
Taliska Koonfurta Mareykanka ayaa sidoo kale sheegtay in xog sirdoon oo la xaqiijiyay ay muujisay in doontu si firfircoon ugu lug lahayd ka ganacsiga daroogada. Dadkii lagu dilay weerarka ayaa talisku ku tilmaamay “argagixiso ku lug leh ka ganacsiga daroogada”.
Taliska Koonfurta Mareykanka ayaa sidoo kale baahiyay muuqaal muujinaya doonta oo ku socota biyaha Caribbean-ka, ka hor inta aan la weerarin. Muuqaalka ayaa muujinaya doonta oo uu qarax xooggan ku dhaco, iyadoo dab uu qabsaday.
Taliska Koonfurta Mareykanka ma aysan bixin faahfaahin dheeraad ah oo ku saabsan cidda lahayd doonta ama halka ay ku wajahneyd. Weerarka ayaa qayb ka ah hawlgallada Mareykanka ee lagu beegsanayo maraakiibta looga shakiyo inay ku lug leeyihiin ka ganacsiga daroogada ee gobolka Caribbean-ka.
