Florida, US – Madaxweynaha Mareykanka Donald Trump ayaa sheegay in dalkiisu uu 10 daqiiqo gudahood duqeyn ku qaadi karo goobaha looga shakisan yahay inay ku harsan yihiin barnaamijka nukliyeerka Iiraan, taasoo muujinaysa suurtagalnimada in Mareykanku dib u bilaabo weerarrada, inkastoo ay socdaan wada-hadallo diblomaasiyadeed.
Trump oo Sabtidii kula hadlayay wariyeyaasha gurigiisa Mar-a-Lago ee gobolka Florida ayaa sheegay in howlgalladii milatari ee Mareykanku ay si weyn u wiiqeen awoodda ciidamada iyo kaabayaasha nukliyeerka Iiraan. Wuxuu xusay inay harsan yihiin hal ama laba goobood oo la beegsan karo, isaga oo si gaar ah u magacaabay buurta Pickaxe Mountain oo looga shakisan yahay inay ku taallo xarun nukliyeer.
Madaxweynaha Mareykanka ayaa sheegay inuusan ku degdegeyn heshiis lala gaaro Iiraan, inkastoo ay socdaan wada-hadallo ay Qatar dhex-dhexaadinayso. Markii la weydiiyay in weerarrada dib loo bilaabi karo toddobaadkan, Trump kama jawaabin si toos ah, balse wuxuu sheegay inuusan shaacin karin qorshaha Mareykanka.
Trump ayaa mar kale ku celiyay in Washington aysan marnaba oggolaan doonin in Iiraan yeelato hub nukliyeer ah, isaga oo sheegay in Tehran ay doonayso heshiis, balse uusan kalsooni buuxda ku qabin mowqifkeeda. Wuxuu ku eedeeyay dowladda Iiraan inay marar badan ka laabato heshiisyada ay gaarto, inkastoo uu sheegay in wada-hadalladu ay socdaan.
Hadalka Trump ayaa yimid kaddib markii wadaxaajoodayaasha Iiraan ay Sabtidii magaalada Doha kula kulmeen dhex-dhexaadiyeyaasha Qatar, iyagoo raadinaya xal diblomaasiyadeed oo lagu soo afjaro colaadda. Xiisadda Bariga Dhexe ayaa sare u kacday tan iyo markii Mareykanka iyo Israa’iil ay 28-kii Febraayo weerarro ku qaadeen Iiraan, taasoo dhalisay jawaab-celin militari oo Iiraan ka fulisay guud ahaan gobolka.
