𝐒𝐨𝐨𝐦𝐚𝐚𝐥𝐢𝐲𝐚 𝐢𝐲𝐨 𝐒𝐰𝐢𝐭𝐳𝐞𝐫𝐥𝐚𝐧𝐝 𝐨𝐨 𝐃𝐚𝐚𝐡-𝐟𝐮𝐫𝐚𝐲 𝐌𝐚𝐬𝐡𝐫𝐮𝐮𝐜 𝐂𝐮𝐬𝐮𝐛 𝐨𝐨 𝐋𝐚𝐠𝐮 𝐗𝐨𝐨𝐣𝐢𝐧𝐚𝐲𝐨 𝐇𝐨𝐫𝐮𝐦𝐚𝐫𝐢𝐧𝐭𝐚 𝐌𝐚𝐚𝐫𝐞𝐲𝐧𝐭𝐚 𝐢𝐲𝐨 𝐒𝐮𝐠𝐢𝐝𝐚 𝐀𝐦𝐧𝐢𝐠𝐚 𝐗𝐮𝐝𝐮𝐮𝐝𝐚𝐡𝐚 𝐝𝐚𝐥𝐤𝐚

Muqdisho, Juun 24, 2026 – Hay’adda Socdaalka iyo Jinsiyadda Soomaaliya (HSJ), Hay’adda Socdaalka Switzerland (SEM) iyo Hay’adda Socdaalka Adduunka (IOM) ayaa maanta si wadajir ah magaalada Muqdisho uga daah-furay mashruuca “Kobcinta Awoodaha Maareynta Xuduudaha Soomaaliya ee Horumarinta Amniga Qaranka – Wajiga II”, kaas oo loogu talagalay xoojinta awoodaha Soomaaliya ee maareynta xuduudaha, kor u qaadista amniga iyo horumarinta nidaamyada maamulka socdaalka.

Munaasabadda daah-furka ayaa ka dhacday xarunta dhexe ee Hay’adda Socdaalka iyo Jinsiyadda Soomaaliya, waxaana ka qayb galay Agaasimaha Guud ee HSJ, Mudane Xuseen Qaasim Yuusuf, Agaasimaha Guud ee Hay’adda Socdaalka Switzerland (SEM), Danjire. Hendrick Krauskopf, masuuliyiin ka socotay IOM iyo madax kale oo ka tirsan HSJ.

Agaasimaha Guud ee HSJ Mudane Xuseen Qaasim Yuusuf ayaa uga mahadceliyay Dowladda Switzerland taageerada joogtada ah ay siiso Soomaaliya, isaga oo xusay in mashruucani uu wax weyn ka tari doono horumarinta maamulka xuduudaha iyo kaabayaasha adeeg bixinta sida dib-u-dhiska Xarunta Dhexe ee Baasaboor Bixinta ee Muqdisho.

Dhankooda, Madaxda SEM iyo IOM ayaa adkeeyay sida ay uga go’an tahay sii wadidda taageerada ay siiyaan Soomaaliya, iyaga oo bogaadiyay horumarka ay HSJ ka sameysay dib-u-habaynta hay’adda, casriyeynta adeegyada iyo xoojinta maamulka socdaalka.