MUQDISHO – Dowladda UK ayaa Isniintii furtay codsiyada deeqaha waxbarasho ee Chevening Scholarship, iyadoo ugu baaqday xirfadlayaasha Soomaaliyeed inay ka faa’iideystaan fursadda ay ku sii wadan karaan waxbarashada heerka Master-ka ee jaamacadaha ugu caansan dalka Britain.
Deeqdan, oo si buuxda loo maalgeliyo, ayaa sannad kasta loo bixiyaa dadka leh karti hoggaamineed iyo hammi ay ku horumarin karaan bulshadooda. Marka laga soo tago waxbarashada, ka faa’iideystayaashu waxay helaan fursad ay ku dhistaan xiriirro xirfadeed iyo waayo-aragnimo caalami ah oo ay dib ugu soo celiyaan dalkooda.
Tan iyo markii Soomaaliya lagu soo daray barnaamijka, in ka badan 100 Soomaali ah ayaa ku guuleystay deeqdan, iyagoo maanta qayb ka ah shabakad caalami ah oo ay ku mideysan yihiin in ka badan 60,000 oo arday hore iyo xirfadlayaal ka kala yimid daafaha dunida.
Sannadkan, barnaamijka waxaa Soomaaliya ka taageeraya Hormuud Salaam Foundation, oo ballanqaadday inay maalgeliso laba arday oo Soomaali ah sannad kasta inta u dhexeysa sannadaha waxbarasho ee 2025/26 iyo 2027/28. Taageeradan ayaa la filayaa inay kordhiso tirada Soomaalida ee ka faa’iideysanaysa deeqda.
Danjiraha UK ee Soomaaliya, Charles King, ayaa sheegay in maalgashiga ugu muhiimsan ee Soomaaliya uu yahay dadkeeda.
“Soomaalidu waxay leedahay karti iyo himilo weyn. Chevening waxay siinaysaa fursad ay ku helaan waxbarasho heer caalami ah, ku dhistaan xiriirro cusub, kadibna ay aqoontooda ugu soo celiyaan dalkooda si ay uga qayb qaataan horumarkiisa,” ayuu yiri.
Madaxa Waaxda Deeqaha Waxbarasho ee Wasaaradda Arrimaha Dibadda ee UK (FCDO), Emma Hennessey, ayaa sheegtay in Chevening ay raadinayso dad leh karti hoggaamineed, himilo cad iyo rabitaan ay ku abuuraan isbeddel waara. Waxay intaas ku dartay in si gaar ah loo dhiirrigelinayo codsiyada ka imanaya kooxaha aan inta badan helin fursadaha noocan oo kale ah.
Codsiyada deeqaha ayaa furmay 4-ta Agoosto, waxaana la soo gudbin karaa illaa 6-da Oktoobar 2026. Dowladda UK waxay ku boorrisay dadka doonaya inay codsadaan inay si wanaagsan u bartaan shuruudaha iyo habraaca barnaamijka si ay u diyaariyaan codsi tartan geli kara.
Barnaamijka Chevening ayaa la aasaasay sanadkii 1983, wuxuuna noqday mid ka mid ah deeqaha waxbarasho ee ugu sumcadda badan dunida, isagoo fursad siiyay tobannaan kun oo hoggaamiyeyaal, diblomaasiyiin, ganacsato iyo xirfadlayaal ka kala yimid dalal badan.
