Kyiv, Ukraine – Madaxweynaha Ukraine, Volodymyr Zelenskyy, ayaa warqad furan u diray Madaxweynaha Ruushka, Vladimir Putin, isagoo ku baaqay in labada hoggaamiye ay yeeshaan wada-hadallo fool ka fool ah si loo soo afjaro dagaalka socda.
Zelenskyy ayaa sheegay in loo baahan yahay dadaallo degdeg ah oo lagu raadinayo xal diblomaasiyadeed, isagoo soo jeediyay in kulan toos ah lagu qabto dal dhexdhexaad ah.
Warqadda ayaa sidoo kale si weyn u dhaliishay hoggaanka Putin, iyadoo Zelenskyy uu ku eedeeyay Moscow inay qorsheyneyso inay sii dheereyso dagaalka ilaa sannadaha 2027 iyo 2028.
Dhankiisa, Putin ayaa sheegay in Ruushku xoojin doono nidaamyadiisa difaaca cirka kadib weerarro diyaarado aan duuliye lahayn oo Ukraine ay ka fulisay gudaha dalka Ruushka, kuwaas oo gaaray meelo ka fog xuduudaha.
Dhanka kale, Mareykanka ayaa soo dhaweeyay fikradda kulan dhex mara labada hoggaamiye, iyadoo Madaxweyne Donald Trump uu sheegay in labada dhinac ay sameeyaan tanaasul si heshiis loo gaaro.
