Canary Islands, Spain – Hoggaamiyaha gobolka Canary Islands, Fernando Clavijo, ayaa si adag uga soo horjeestay in markab dalxiis ay saameysay faafitaanka cudurka halista ah ee Hantavirus loo oggolaado inuu ku xirmo jasiiradahaas.
Clavijo ayaa sheegay in go’aankan uusan ku saleysneyn tixgelin farsamo oo buuxda, isla markaana aan la hayn macluumaad ku filan oo shacabka lagu qancin karo ama lagu hubin karo badbaado.
Wuxuu intaas ku daray inuu codsaday kulan degdeg ah oo uu la yeesho Ra’iisul Wasaaraha Spain Pedro Sánchez si looga wada hadlo xaaladdan, maadaama uu arrintan ka mid yahay khilaaf siyaasadeed oo u dhexeeya xisbiyada dalka.
Warbaahinta dowladda Spain ayaa hore u sheegtay in markabka raaxada ah ee MV Hondius uu qorsheynayo inuu ku xirmo jasiiradda Tenerife, balse dowladda gobolka ayaa ka digtay halista caafimaad ee ka dhalan karta.
Xaaladdan ayaa dhalisay walaac amni iyo caafimaad, iyadoo mas’uuliyiintu ay sii wadaan dood ku saabsan sida loo maareynayo markabkan iyo dadka saaran si looga hortago faafitaanka cudurka.
